Rydym am eich helpu i deimlo'n barod ar gyfer eich asesiad wyneb yn wyneb. Rydym yn cynnal cannoedd o filoedd o asesiadau bob blwyddyn, ac rydym yn sicrhau ein bod yn rhoi gwasanaeth sensitif a pharchus i chi.

Os oes angen rhagor o help arnoch cyn eich asesiad, gallwch ein ffonio ar 0800 072 0222.

Dewiswch un o'r opsiynau isod i fynd i'r adran berthnasol:

Cyn eich asesiad Yn ystod eich asesiad Ar ôl eich asesiad Cwestiynau Cyffredin

Cyn eich asesiad

Cyn eich asesiad

Os ydych yn gwneud cais am Gredyd Cynhwysol (UC) efallai y byddwch yn derbyn holiadur gallu i weithio, a elwir hefyd yn ffurflen UC50. Mae'n bwysig eich bod yn llenwi'r ffurflen mor llawn â phosibl, gan ateb yr holl gwestiynau.

Gwnewch yn siŵr eich bod yn dychwelyd y ffurflen erbyn y dyddiad ar y llythyr a anfonir atoch. Byddwn yn defnyddio'r wybodaeth a roddwch ar y ffurflen i benderfynu a oes angen i chi ddod i mewn ar gyfer asesiad wyneb yn wyneb ai peidio.

Gallwch hefyd lawrlwytho'r  ffurflen UC50 i'ch cyfrifiadur. Os ydych chi'n defnyddio'r ffurflen ar-lein, llenwch y ffurflen, ei hargraffu, ei llofnodi ac yna ei hanfon atom.

Angen help i lenwi'r ffurflen?

Os oes angen help arnoch i lenwi'r ffurflen, gallwch nawr siarad ag ymgynghorydd penodol ar ein llinell gymorth trwy ffonio 0800 072 0222.

Trefniadau apwyntiad

Byddwn yn anfon llythyr gyda'ch dyddiad asesu. Bydd gan eich llythyr apwyntiad rif cyswllt a gwybodaeth am yr asesiad, gan gynnwys cyfarwyddiadau i’r Canolfan Asesu. Darllenwch y llythyr hwn cyn eich asesiad.

Darganfyddwch fwy am eich canolfan asesu yma

Os oes angen help arnoch cyn eich asesiad, ffoniwch ein tîm Ymholiadau Cwsmeriaid ar 0800 072 0226. Mae'r llinell ymholiadau cwsmeriaid ar agor o ddydd Llun i ddydd Gwener rhwng 8am ac 8pm, a dydd Sadwrn 9am tan 5pm.

Beth sy'n digwydd gyda'ch cefnogaeth cyn eich asesiad

Tra byddwch yn aros i'ch asesiad gael ei gwblhau, byddwch yn derbyn cyfradd safonol Credyd Cynhwysol a bydd angen i chi barhau i fynychu'r Ganolfan Waith fel y cytunwyd gyda'ch anogwr gwaith.

Sylwch fod ffactorau gwahanol yn cael eu hystyried a allai effeithio ar eich hawl i fudd-dal. Am fwy o wybodaeth ewch i wefan gov.uk.

Gwyliwch y fideo DWP yma ar YouTube ’Starting your Universal Credit Claim’

Beth i ddod gyda chi i'r asesiad

  1. Prawf o hunaniaeth
  2. Unrhyw feddyginiaeth y gallech fod yn ei chymryd
  3. Unrhyw wybodaeth gan eich meddyg teulu neu arbenigwr sy'n esbonio sut mae'ch cyflwr yn effeithio arnoch chi

Os ydych yn hawlio costau, dewch â manylion eich cyfrif banc os oes gennych un. 

Cyfieithwyr

Rhowch wybod i ni o leiaf ddau ddiwrnod cyn eich asesiad os oes angen cyfieithydd arnoch ar gyfer eich asesiad. Bydd hyn yn helpu i sicrhau y gallwn gael cyfieithydd i chi.

Tystiolaeth bellach

Mae angen i ni hefyd weld unrhyw dystiolaeth feddygol neu wybodaeth arall sydd gennych eisoes, megis adroddiadau, cynlluniau gofal neu driniaeth amdanoch gan feddygon teulu, meddygon ysbyty, nyrsys arbenigol, nyrsys seiciatryddol cymunedol, therapyddion galwedigaethol, ffisiotherapyddion, gweithwyr cymdeithasol, gweithwyr cymorth, tîm cymorth anabledd dysgu, cwnselwyr neu ofalwyr.

Pethau yr hoffai'r Gwasanaeth Ymgynghorol Asesiad Iechyd eu gweld os oes gennych chi rai eisoes:

Mae'r pethau nad oes angen i Capita eu gweld yn cynnwys gwybodaeth gyffredinol am eich cyflyrau meddygol nad ydynt yn ymwneud â chi'n bersonol:

  • Eich rhestr presgripsiynau gyfredol
  • Eich datganiad o anghenion addysgol arbennig
  • Dyddiadur trawiad epilepsi
  • Eich tystysgrif nam ar y golwg
  • Pasbortau ysbyty. Dyma gofnod ysgrifenedig a gedwir gan bobl ag anableddau dysgu i roi gwybodaeth bwysig i staff ysbytai amdanynt a'u hiechyd pan fyddant yn cael eu derbyn i'r ysbyty.
  • Cynlluniau Iechyd Addysg.
  • Dyddiadur o'ch symptomau os yw eich anabledd, eich salwch neu’ch cyflwr iechyd yn amrywio o ddydd i ddydd.
  • Gwybodaeth arhosiad hir i'r ysbyty gan gynnwys dyddiad mynediad, hyd arhosiad ac enw a chyfeiriad yr ysbyty.
  • Canlyniadau profion meddygol gan gynnwys:
    • Sganiau
    • Awdioleg
    • Canlyniadau pelydr-x, ond nid y pelydrau x eu hunain..
  • Ffotograffau
  • Llythyrau am fudd-daliadau eraill
  • Taflenni ffeithiau am eich meddyginiaeth
  • Printiadau o’r rhyngrwyd
  • Datganiad o Ffitrwydd i Weithio, a elwir hefyd yn nodiadau ffitrwydd
  • Tystysgrifau meddygol
  • Datganiadau neu nodiadau salwch meddyg
  • Llythyrau apwyntiad

 

Efallai y gofynnir i chi am fanylion y gweithwyr proffesiynol neu'r gofalwyr sy'n gwybod fwyaf am eich cyflyrau iechyd, salwch ac anableddau. Gallai'r rhain fod yn: 

Rhestr o weithwyr proffesiynol a gyrfaoedd

  • Ymgynghorydd neu Feddyg Arbenigol
  • Seiciatrydd
  • Nyrs Arbenigol, fel Nyrs Seiciatrig Gymunedol
  • Ffisiotherapydd
  • Therapydd Galwedigaethol
  • Gweithiwr Cymdeithasol
  • Gweithiwr cymorth neu gynorthwyydd personol 
  • Gofalwr

Cofiwch – anfonwch gopïau o wybodaeth feddygol neu wybodaeth arall atom os oes gennych chi nhw eisoes yn unig. Peidiwch â gofyn na thalu am wybodaeth newydd nac anfon dogfennau gwreiddiol atom. Ysgrifennwch eich rhif Yswiriant Gwladol ar bob darn o wybodaeth a anfonwch atom. 

Os nad ydych wedi derbyn ffurflen UC50 eto, gallai fod yn haws i chi os byddwch yn dechrau casglu peth o'ch gwybodaeth feddygol ymlaen llaw. Efallai na fydd yr Adran Gwaith a Phensiynau yn gallu parhau i dalu budd-daliadau i chi os na fyddwn yn derbyn y ffurflen hon mewn pryd.

Os na allwch ddychwelyd y ffurflen mewn pryd, rhowch wybod i ni cyn gynted â phosibl. Mae yna hefyd flwch sy'n galluogi i chi esbonio pam roedd eich ffurflen yn hwyr. Os oes gennych unrhyw bryderon o gwbl am y ffurflen, mae’n bwysig eich bod yn cysylltu â ni cyn gynted ag y gallwch neu gofynnwch i gynrychiolydd gysylltwch â ni.

Yn ystod eich asesiad

Y cyfweliad asesu

Bydd y Gweithiwr Gofal Iechyd Proffesiynol yn cyflwyno ei hun ac yn esbonio'r asesiad i chi. Byddant yn cofnodi gwybodaeth ar gyfrifiadur. Efallai na fydd rhai cwestiynau'n ymwneud yn uniongyrchol â'ch cyflwr meddygol, ond â gweithgareddau dyddiol.

Gall y cwestiynau asesu gynnwys:

  • Pryd ddechreuodd eich salwch neu anabledd
  • Sut mae'ch cyflwr yn newid o ddydd i ddydd
  • Sut mae'n effeithio ar eich bywyd bob dydd
  • Sut mae'n effeithio ar eich hwyliau a'r ffordd rydych chi'n ymddwyn
  • Sut rydych chi'n ymdopi â phethau o ddydd i ddydd

Bydd y Gweithiwr Gofal Iechyd Proffesiynol yn cofnodi gwybodaeth am eich poen, blinder a'r feddyginiaeth rydych chi'n ei chymryd.

Gan ddibynnu ar eich salwch neu anabledd, gall yr asesiad gynnwys:

  • Archwiliad corfforol
  • Profion pwysedd gwaed, golwg, clyw neu brofion eraill
  • Symudiadau fel ymestyn, sefyll a phlygu

Ni fydd y Gweithiwr Gofal Iechyd Proffesiynol yn gofyn i chi wneud unrhyw symudiadau sy'n achosi poen i chi. Os ydych chi'n poeni y gallai rhai symudiadau achosi poen i chi, dywedwch wrth y Gweithiwr Gofal Iechyd Proffesiynol.

Rydym yn darparu Adroddiad Asesu i'r DWP sy'n ddiduedd ac yn rhoi cyngor meddygol wedi’i gyfiawnhau am sut mae eich cyflwr meddygol yn effeithio arnoch ar hyn o bryd. Mae hyn yn dilyn deddfwriaeth y llywodraeth a'r prosesau y cytunwyd arnynt gan DWP.

Y Gweithiwr Gofal Iechyd Proffesiynol

Mae ein Gweithwyr Gofal Iechyd Proffesiynol yn feddygon, nyrsys a ffisiotherapyddion sydd wedi'u cofrestru gyda'u corff llywodraethu. Maent yn mynd trwy gwrs hyfforddi wedi'i ddylunio'n benodol, a gymeradwywyd gan DWP.

Cydymaith yn ystod eich asesiad

Mae croeso i chi ddod â pherthynas, gofalwr neu ffrind gyda chi. Er y bydd yr asesiad yn canolbwyntio arnoch chi, gall cydymaith gynnig cefnogaeth ddefnyddiol i chi.

Cymryd nodiadau

Mae croeso i chi neu'ch cydymaith gymryd nodiadau at eich defnydd personol. Ni fydd eich nodiadau yn rhan o'r adroddiad meddygol a anfonwn at yr Adran Gwaith a Phensiynau.

Amser aros a hyd yr asesiad

Byddwn yn sicrhau eich bod yn cael eich gweld cyn gynted â phosibl. Bydd y derbynnydd yn dweud wrthych a fydd yn rhaid i chi aros.

Gall pobl eraill sy'n cyrraedd ar eich ôl chi fynd i'w hasesiad o’ch blaen chi. Mae hyn oherwydd ein bod yn gwneud sawl math o asesiadau, ac mae rhai yn cymryd mwy o amser nag eraill. Nid oes amser penodol ar gyfer asesiadau, ond fel arfer maent rhwng 20 munud ac 1 awr.

Ar ôl eich asesiad

Ar ôl eich asesiad mae ein Gweithiwr Gofal Iechyd Proffesiynol yn cwblhau adroddiad gan ddefnyddio meini prawf a nodwyd gan yr Adran Gwaith a Phensiynau (DWP). Mae hyn er mwyn rhoi barn feddygol ddiduedd, wedi’i chyfiawnhau i Wneuthurwr Penderfyniadau’r DWP ynghylch sut mae eich cyflwr meddygol yn effeithio arnoch chi.

Bydd yr Adroddiad Asesu yn disgrifio'ch cyflyrau meddygol a'r gweithgareddau rydych chi'n eu gwneud mewn diwrnod arferol. Bydd hefyd yn cynnwys sylwadau'r Gweithiwr Gofal Iechyd Proffesiynol, a chanlyniadau unrhyw archwiliad corfforol a wneir.

Mae'r adroddiad yn un darn o wybodaeth a ddefnyddir gan y DWP wrth benderfynu ar eich cais. Nid yw’r Gweithiwr Gofal Iechyd Proffesiynol sy’n gwneud eich asesiad yn gwneud unrhyw benderfyniad am eich lwfans, eich budd-daliadau na’ch credydau.

Gallwch ofyn am gopi o'r adroddiad llawn gan swyddfa'r DWP sy'n ymdrin â'ch cais.

Penderfyniadau ar geisiadau

Mae’r DWP yn gwneud penderfyniadau ar geisiadau a byddent yn rhoi gwybod i chi am ganlyniad eich cais. Dylech gyfeirio unrhyw gwestiynau neu bryderon am ganlyniad eich cais i swyddfa’r DWP sy’n ymdrin â’ch cais. Byddant yn gwybod pa wybodaeth y maent wedi’i defnyddio i benderfynu ar eich hawl. Ni fydd Capita yn ymwybodol o hyn. Nid ydym yn cymryd rhan yn y broses benderfynu.

Hawlio treuliau

Mae Capita yn talu treuliau:

  • Teithio ar drafnidiaeth gyhoeddus
  • Tuag at gostau tanwydd ar gyfer ceir preifat
  • Cost parcio pan nad yw ar gael yn y Ganolfan Asesu.

Byddwn hefyd yn talu costau cydymaith, perthynas, gofalwr neu blant ifanc a fyddai fel arall yn cael eu gadael heb oruchwyliaeth. Os ydych yn dymuno gwneud cais i gydymaith awdurdodedig deithio gyda chi, cysylltwch â ni ar 0800 072 0226 cyn yr asesiad a rhowch wybod i ni.

Er mwyn cael eich talu am unrhyw dreuliau, bydd angen i chi lenwi a chyflwyno ffurflen gostau. Gallwch ofyn i'r derbynnydd yn y Ganolfan Asesu am help i lenwi'r ffurflen. Cadwch eich holl dderbynebau os gwelwch yn dda. Dylech dderbyn taliad am eich treuliau tua phythefnos ar ôl i chi anfon y ffurflen.

Mwy o wybodaeth

Os oes gennych unrhyw gwestiynau, cysylltwch â swyddfa'r DWP sy’n ymdrin â’ch cais. Bydd rhif y swyddfa ar lythyrau rydych chi wedi'u derbyn am eich cais.

Ar gyfer Credyd Cynhwysol dylech ddefnyddio'ch Dyddlyfr i gysylltu â'r DWP.

*[DWP]: Adran Gwaith a Phensiynau

*[UC]: Gredyd Cynhwysol

Health assessment advisory service provided on behalf of Adran Gwaith a Phensiynau